مانقدرش نقض عالڨمنة طرفي
مانوفي قدر المحبة في لبيات
ماڨدمت طعام ضيفتنا حرفي
ماخالفت خصال جدي والعادات
مايكمل في نوتة قصيدي عزفي
حت يزور جدايني ليلة ويبات
حين نعاهد كلمتي لازم نوفي
ونسلم لشيوخ وطني والسادات
جاهيتك يادمعة عيوني كفي
خليني نطوي بشوقي لمسافات
كي نصفاهم جمرة الشوق نطفي
ونلمو وميعادنا بعد التشتات
نحمل عنكم فوق مايحمل كتفي
امانة منها العين بدم بكات
معروف انا دايمنا واجد صرفي
حرف قصيدي كي يخرج بالتنهات
يوم. الشدة ليه هندتو سيفي
وعلى حبك كل لحروف تلاقات
المرزوقي من سجرتك نور عرفي
واسوادو في راس محنتنا شيبات
مرواني قمح الشلف ذهب مصفى
ومعشر بمحبتك صدقة وزكات
ويربع من زورة احبابي صيفي
دعوتكم ليها جوارحنا لبات
طب قلوب قصايدك راها تشفي
تتغلغل في جوف سامعها وتبات
جلفاوي في زمرة الدم وشلفي
والجزاير مالكة روحي والذات
الشاعر : دحمان سالم
0 تعليقات