مين اللي شد العمر من جواي؟!!- شعر / أحمد فخري الأسواني

 مين اللي شد العمر من جواي ؟!!

خلاني اوقع مـ السنين عشرين 

دانا كنت لسه يادوبي راح افكر 

ازاي هكون لما أوصل العشرين ؟

مرت سنيني جنبي راكبه البرق 

العمر فجأة أضرب في اتنين 

***

غربة يا صاحبي كلنا أغراب 

الدنيا إيه فيها غير ضباب وسراب ؟!!

مهما اقابل خلق عـ السكة 

ماعرفش احوش منهم أصحاب !!

أغراب يا صاحبي كلنا أغراب 

***

أنا كنت عايش جوه حصن امين 

شدو ايديا ولا كان رجلي 

انا نفسي اعرف بس شدها مين ؟!

واوات قالوا مبروك جدع اسمر 

ما عرفش انه مجهزين لي كمين !!

بين العيال انا كنت وحديا 

لو يلعبوا كورة احب اوقف جون 

جايز عشان طول عمري بتصدر  

لكني عمري ما أعرف امنع جون 

كان اللسان موصول من جوفي علي برة 

ماعرفش مين قطعه ؟

خلي الكلام يتكب 

والصدر يغرق بيه 

انا كنت واقف والسنين بتمر 

من غربة اروح غربة 

من حبس ادخل حبس 

مع اني مش ثورجي 

او ليا في الهتافات 

ما يفرقش عاش الملك

 ولا الملك كان مات 

انا كل همي ازق شمس اليوم 

وانفد بعمري من زحمه المتاهات

*** 

زحمه في زحمه 

العمر ضاع في زحام 

ولا السنين وقعت وسط كراكيبي 

لعبت رست 

وحدي مع الايام 

وقعت إيديا واتغلبت اتنين 

والعمر فجأة لقيته بقي ضعفين