مين اجاز ؟ - شعر / أبو زيد بيومي

مين أجازلك 

مين أجاز 

إن طيارة عدوك 

ييجي يوم تفرد جناحها 

ع الحجاز 

مين أنابك 

هوّ كان الباب دا بابك 

لجل تفتح للنجاسة

مين سمحلك بالزعامة والرياسة 

الكراسي و العروش 

والعبايات اللي نازلة ع الكروش 

عمرها  ما تخلّى دمّك يوم  حقيقي

بعد ما أصبح مجاز

انت فين من طفل

مفطوم ع الحجارة 

والبنادق شاربة من دمه بحرارة

هوّ واقف وحده أعزل

بس قلبه فيه جسارة

وانت ماسك بس ف ديول الإمارة

انت مركب رمل عايمة ف بحر غاز

كنت فين 

لما كان القدس مهبط للبراق

لما كان الشام حضارة .. والعراق

لما كانت مكة مقصد للجميع 

لما كان الكل ليها 

إما خاضع أو مطيع 

كنت سارح خلف أغنام القطيع

كنت خيمة ولمبة ..... جاز

مين أجازلك 

مين أجاز

ترفع الراية لعدوك باعتزاز

يبقى بينكم اتفاق

قطْع إيدك 

لما مديتها بوفاق 

قطْع إيدك 

يوم ما داست

ع الملفات القديمة

يوم ما تمسح للأعادي 

كل آثار الجريمة 

لما يبقى الحضن بينكم 

فيه مشاعركم حميمة 

قطْع كل لسان بينطق بالجواز

قطْع كل لسان يزوّر في الأدلة 

أو بيهتف للأذلة

انتو شلة

والخيانة طبع فيكم   

بامتياز