حياتي افيش- شعر / مصطفي فريد

أنا قوتى فى قلمى

وضعفى فى لسانى

وحبره إللى من ألمى

بيهدى وجدانى

عايش مابين كفى

لجامى وحصانى

فى الحق دايعما عنيد

وعمره ما عصانى

كتيير كتبنى قصايد

مليانه بمعانى

مبدوره فوق سكتى

والقصة عجبانى

يلاعبنى ساعات سيجه

يحاورنى ع السيكه

يطربنى ع الأوتار

بأغانى من أشعار

حروفها زى النار

يدندن وانا مبسوط

مالى حياتى بالزحمه

حروفه شقيه رقاصة

ضاربه الظلم برصاصه

قناصه بقلب حديد

بتجرى بعقرب الساعة

لفين رايحه

متسألونيش

حياتى أفيش

شبعت من الزمن تلطيش

وفى الآخر بتبقى مافيش

يادوب نظرة وبتعدى

سرقة من ما بين الشيش

يسرسب لوم سنين الطيش

على سطور الحياة تهميش

ويفضل قوتى فى قلمى

وضعف العمر فى لسانى

نزيف حبره إللى من دمى

بيعوضنى حرمانى

من العمر إللى فات كله

ندهته بس ماسمعنيش

يادوب خطوة ورى التانيه

طلعت منه على التفتيش

وصوت قلمى إللى ساكنى

عاش فى ضميرى متحكم

وبعد خروجى ما خذلنيش