كتبت حنان عبد الرازق
نقدم نصيحة للاأم التي عندها طفل عمره سنة ومن هذه النصائح
١- مهم اوي تبني عاده سليمه لوقت الاكل بلاش اكل قدام التليفزيون ولا موبايلخلي للاكل احترامه ووقته المحدد
٢- عرفي ابنك علي مذاقات الاكل المختلفة بلاش يبقي بين المالح و الحلو أدي فرصه لحاسات التّذوق انها تنمو صح و تتعود علي كل المذاقات المختلفة
٣- قدمي لابنك الأكلات المختلفة و عوديه دايما يتذوق بتشجيعك ليه و بلاش ندخل الزعل في الاكل يعني بلاش " هزعل منك لو ما خلصتش طبقك ولا كل علشان خاطري "!!
٤- ارجوكي ارجوكي بلاش " كل علشان اجيبلك حاجه حلوه "!ليه نعوده انه بياكل الاكل المفيد علشان ياخد حاجه ضاره كتشجيع ؟!
٥- دايما خلي في متناول أيد ابنك سناكس صحيه زي طبق فيه خيار مقشر و خَس و جزر مبشور مثلا علشان يتعود اما يجوع بين الوجبات يأكل خضار مش بسكوت
٦- اعتمدي علي وجبات صغيره متنوعة خلال اليوم الطفل في السن ده معدته صغيره و مش هيقدر يأكل طبق مليان
٧- بدل الوجبات سريعه التحضير المعلبه ( الي بتقدم للاطفال من سن ٦ أشهر ) اعتمدي علي الاكل الطبيعي اطبخي رز بني و اكليه لطفلك ممكن باللبن علي الفطار ( مع ضربه في الكبه شويه و طبعا نقعه قبل الطبخ ) بلاش الرز الأبيض و المكرونة لو بتدوري علي غذاء ابنك السليم
٨- بلاش عيش حاف ارجوكي ! و ياريت بلاش عيش من بتاع المصانع خالص
٩- اقري مكونات البسكوت وأي شيء مغلق و الاحسن بلاش منه خالص
١٠- بلاش جبنه مثلثات !! ليه نأكله شيء مصنع لما ممكن يأكل بيض و فول و عدس و حُمُّص ؟!
١١- عوديه يشرب ميه و ارجوكي بلاش العصير المعلب
١٢- تأكدي ان العادات الي بتبنيها دلوقتي هيكون ليها اثر علي صحته طول حياته فاهتمي ببناء عادات و تغذيه سليمه من اول يوم
١٣- نوعي في الاكلات و استخدمي ألوان الخضار المختلفة في تجهيز الشوربه و الماكولات المختلفة
١٤- اعملي كيك في البيت بلاش نعتمد علي البسكوتات والكيك المصنع علشان صحه ولادنا
١٥- اهم حاجه: كوني متاكده انك المصدر الاول لتعليم أطفالك
كوني قدوه و شجعيهم علي العادات الصحيه السليمه بتطبيقها علي نفسك اولا
يعني هو هيقلدك بلاش المشروبات الغازيه الي مليانه سكر و كوارث كتير
0 تعليقات